அத்தியாயம் 23
அன்று மாலை வேலை முடிந்தவுடன், விஜயே அஞ்சலியை ஒரு மிகப்பெரிய ஷாப்பிங் மாலிற்கு அழைத்துச் சென்றான். அவளுக்குத் தேவையான அனைத்தையும் தன் பணத்தில் வாங்கிக் கொடுத்து, அவளை உச்சந்தலை முதல் உள்ளங்கால் வரை அலங்காரப் பொருட்களால் நிறைத்து வைத்தான். “இவை எதுவுமே வேண்டாம், உன்னுடைய சந்தோஷமான முகமும், என் மீது நீ காட்டும் பாசமுமே போதும்; என்னை ஒருமுறை அன்போடு பாரேன்” என்று அஞ்சலியின் மனம் ஏங்கியது. அது அவனுக்குத் தெரிந்தாலும், திமிர் பிடித்த அவனோ, “நீ எனக்கு இரண்டாம் பட்சம்தான்” என்பது போலவும், ஏதோ தான் பிச்சை போட்டு அவளுக்கு வாழ்க்கை கொடுத்தது போலவும் பிகு செய்து கொண்டிருந்தான்.
“எனக்கு இந்த மாதிரி ஓவர் காஸ்ட்யூம் (Over costume) எல்லாம் பிடிக்காது. எனக்குச் சிம்பிளான டிரஸ் தான் பிடிக்கும். எனக்கு கம்பர்டபிளா (Comfortable) இருந்தால்தான் போட முடியும். ப்ளீஸ்… எனக்கு இதெல்லாம் வேண்டாம்,” என்று அவள் மறுக்க, அதற்கும் அவளைக் குத்திக் கிழித்தான் விஜய்.
“இதுக்கு முன்னாடி நீ பஞ்ச பரதேசி வீட்ல பிறந்த மிடில் கிளாஸ் பொண்ணு. ஆனா இப்போ விஜய்யோட மனைவி எப்படி இருக்கணும்னு தெரியும்ல? இங்க பாரு, ஒரு காலத்துல எங்களுக்கும் எதுவும் இல்லதான். எங்க தாத்தா காலத்துல இருந்து கொஞ்சம் கொஞ்சமா உழைச்சு முன்னுக்கு வந்திருக்கோம். இடத்திற்கு ஏத்த மாதிரி நம்மளும் மாறணும், அதான் நல்லது. ஒழுங்கா நான் சொல்ற பேச்சைக் கேளு. அப்புறம் எல்லாத்தையும் பேக் (Pack) பண்ணிக்கோ… இன்னைக்கு நைட்டே நம்ம பிரைவேட் ஜெட்டில் (Private Jet) ஹனிமூன் போகப் போறோம்,” என்று ஒரு கட்டளையாகச் சொன்னான்.
அதற்கும் அவள் தலையாட்டி வைத்தாள். ‘என்னிடம் ஒரு வார்த்தை கேட்க மாட்டாயா? என்னை என்ன நினைத்துக் கொண்டிருக்கிறாய்?’ என்று ஒரு பெண் கேட்டாலே போதும், பல பிரச்சனைகள் தீர்ந்துவிடும். ஆனால் கணவன் சொல்லிவிட்டார், அதற்கு மேல் என்ன இருக்கிறது என்று நினைத்து அமைதியாகிவிட்டாள் அஞ்சலி.
வீட்டிற்குச் சென்று அனைவரிடமும் தேனிலவு செல்வதைத் தகவலாகச் சொல்லிவிட்டு, அவசரமாகத் தயாரானார்கள். இருவரும் விஜய்க்குச் சொந்தமான பிரைவேட் ஜெட்டில் பயணம் செய்து கொண்டிருந்தனர். ஒரு ரொமான்டிக்கான கணவனாகத் தெரிந்த விஜய், ஒரு நிமிடத்தில் அரக்கனாக மாறினான். திடீரென்று கீதாஞ்சலியின் சீட் பெல்ட்டை கழற்றிவிட்டு அவளைக் கீழே தள்ளிவிட்டான். கமாண்டரிடம் (Commander) அவன் ஏதோ சொல்ல, விமானம் சற்று வேகமாக ஆட்டம் கண்டது.
“விஜய்… விஜய்… எனக்குப் பயமா இருக்கு! எனக்கு ஹைட் (Height) என்றால் பயம். இப்படி என்னைப் பயமுறுத்துவது சரியில்லை… ப்ளீஸ் விஜய், எனக்குப் பயமா இருக்கு!” என்று அவள் கதறித் துடித்தாள். பின் சீட்டில் அமர்ந்து மூச்சு வாங்க அவனைப் பயத்தோடு பார்த்தாள். ஆனால் விஜய் அதைக் கண்டு கொள்ளாமல் அவளை நக்கலாகப் பார்த்துக் கொண்டிருந்தான்.
தன் கணவன் இப்படிச் சைக்கோத்தனமாகச் செய்வான் என்று அவள் நினைத்துக் கூடப் பார்க்கவில்லை. சராசரிப் பெண்ணாகத் திருமணத்திற்குப் பிறகு ஏமாற்றப்பட்டதாகவே அவள் கருதினாள். அஞ்சலிக்கு அவன் மீதிருந்த நம்பிக்கை அந்த 10 நிமிடச் செயலில் உடைந்து போனது. அவன் காட்டிய அந்தப் பார்வை அவளை இன்னும் நடுங்க வைத்தது. இன்னும் என்னவெல்லாம் நடக்கப் போகிறதோ என்ற பயம் அவள் மனதில் துடிக்க ஆரம்பித்தது.
“எதுக்கு இப்படிச் செஞ்சீங்க? எனக்கு எவ்வளவு பயமா இருந்தது தெரியுமா?” என்று உடல் நடுங்கக் கேட்டாள்.
“எனக்கும் வேதனையாதான் இருக்கு! உன்னைப் பார்க்கும் போதெல்லாம் உன்னைப் பெத்தவன் ஞாபகம் வருது. அவன் நினைப்பு வரும்போதெல்லாம் என் கண்ணு முன்னாடி என் பொண்டாட்டி செத்ததுதான் ஞாபகம் வருது. எல்லாம் உங்களால வந்தது,” என்று கடுமையாகப் பேசினான்.
“உன்னை ஒரு பக்கம் வெறுக்க முடியல, ஆனா இன்னொரு பக்கம் முழுசா நேசிக்கவும் முடியல. அதனாலதான் உன்னைக் கல்யாணம் பண்ணிக்கிட்டு இப்படி டார்ச்சர் (Torture) பண்ணலாம்னு முடிவு பண்ணினேன். அட்லீஸ்ட் அந்தச் சீனிவாசன் செஞ்ச பாவத்துக்குத் தண்டனையா அவன் பெத்த பொண்ணு நீதானே எல்லாத்தையும் அனுபவிக்கணும்? என் வயித்துல இருந்த குழந்தையும், என் வினுவும் இன்னைக்கு இல்ல… அதுக்குக் காரணம் உன் அப்பா!” என்று சிடுசிடுவென்று பேசினான்.
‘இவன் திருந்த மாட்டான்’ என்பது போல் அஞ்சலி அமைதியாகக் கண்களை மூடிக்கொண்டாள். பிறகு அவர்களுக்கு என்று ஒதுக்கப்பட்ட ஒரு தனித்தீவுக்கு வந்து சேர்ந்தனர். அது தேனிலவு வரும் தம்பதிகளுக்காகவே உருவாக்கப்பட்ட ஒரு பிரத்யேகத் தீவு. ஒரு ஐந்து நாட்களுக்கு அந்தத் தீவை விஜய் வாடகைக்கு எடுத்திருந்தான். அங்கே தியேட்டர், ஷாப்பிங் மால், கோவில் என அனைத்து வசதிகளும் இருந்தன. கடற்கரை ஓரமாக இருந்த அந்த இடத்தைப் பார்த்து அஞ்சலி பிரமித்துப்போனாள்.
இருவரும் தங்கள் வீட்டிற்குச் சென்று ஓய்வெடுத்தனர். “ஒருவேளை ஹோட்டலில் சாப்பிட்டுக்கலாம், மத்த நேரம் நாமளே சமைக்கலாம். இப்ப வெளியே போக வேண்டியிருக்கு, இந்த நீல நிற டிசைனர் புடவையைக் கட்டிட்டு வா,” என்று அவளை அனுப்பி வைத்தான். அவளும் தயாராகி வெளியே வர, அங்கே விஜய் கோட் சூட் அணிந்து கம்பீரமாக நின்றிருந்தான்.
இருவரின் பார்வையும் சந்தித்தது. காதலும் ஈகோவும் கலந்த ஒரு பார்வையாக அது இருந்தது. இருவரையும் அழைத்துச் செல்ல ஒரு கார் வந்தது. ஒரு மிகப்பெரிய பார்ட்டி ஹாலிற்கு (Party Hall) வந்து சேர்ந்தனர். அங்கே பல தம்பதிகள் இருந்தனர். விஜய்யைப் பார்த்ததும் அவனது நண்பர்கள் அனைவரும் உற்சாகமடைந்து, “புது மாப்பிள்ளை” பாடலோடு அவர்களை வரவேற்றனர்.
“என்னங்க இது? எல்லாரும் உங்களுக்குத் தெரிஞ்சவங்களா?”
“ஆமா, இது ஒரு சின்ன சர்ப்ரைஸ் (Surprise). என் பிரண்ட்ஸ் எல்லாரும் ஹாலிடேவுக்காக இங்கே வந்திருக்காங்க. அதான் ஒரு சின்ன பார்ட்டி,” என்று சொல்ல, அஞ்சலி மகிழ்ச்சியில் சிரித்தாள். இருவரும் கேக் வெட்டி ஒருவருக்கு ஒருவர் ஊட்டி மகிழ்ந்தனர். அங்கே இருந்த ஒரு முதிய தம்பதியினர் அவர்களை ஆசீர்வதித்தனர்.
“ரெண்டு பேரோட ஜோடிப் பொருத்தம் அம்சமா இருக்கு. ஒருத்தருக்கு ஒருத்தர் விட்டுக்கொடுத்துச் சந்தோஷமா வாழணும்,” என்று அவர்கள் வாழ்த்தினர். விஜய் அதை ஆமோதித்தான். பிறகு பாடல்கள் ஒலிக்க, அனைவரும் நடனமாடத் தொடங்கினர். ஆனால், அங்கே ஒரு ‘கறுப்பாடு’ ஒளிந்திருந்தது. அவன் விஜய்யின் எதிரி நிறுவனத்தைச் சேர்ந்தவன். விஜய் நிம்மதியாக இருக்கக் கூடாது என்பதற்காக அவன் ஒரு மிகப்பெரிய திட்டத்தைத் தீட்டியிருந்தான். அதைத் தன் மனைவி மூலமாகச் செயல்படுத்த விரும்பினான்.
அந்த எதிரியின் மனைவி, அஞ்சலியிடம் நெருங்கிப் பழகி அவளை மூளைச் சலவை (Brainwash) செய்யத் தொடங்கினாள். அதனால் கீதாஞ்சலி, விஜய்யிடமிருந்து ஒரு மிகப்பெரிய ஆபத்தைச் சந்திக்கப் போகிறாள் என்பது அவளுக்குத் தெரியாமல் போனது.
